{ويمكرون ويمكر الله والله خير الماكرين}

تحديث

حسيت انى ابى اكتب من حر ما فينى ، بتكلم فى امو مضايقتنى من الى اشوفه من هالناس

يعنى الواحد غصبن عليه يحتر ويتضايق الموضوع خارج عن نطاق انى حساسه ولا مو حساسه

ليش تسمعين لهم ولا ما عليج منهم !! الموضوع انك تطلع من طورك من طريقة تفكير الناس وعلى اى بيصوتون

يعنى ذاك اليوم كنت فى استقبال وبما ان الناس مالهم سالفه ولا حجوه الا الانتخابات فكانت السوالف كلها عن الانتخابات

وكل وحده تقول من بتعطى وعلى اى اساس بتعطى

الاولى : ولا انا بعطى فلان لان اكلهم لذييذ وقزرناها ناكل منه ما قصر !

الثانيه : انا بعطى فلالان لان اينن شكله حلووو

الثالثه: انا بعطى فلان لان ما قصر خيره سابق والسوق بدون محلاتهم ما ينبغى

الرابعه: بعطى فلان لان اخو صديقتى واعرف مرته واهله

خامسه: بعطى فلالان لان متحرر ما احب الدينين

سادسه: بعطى فلان لانى مفتاح عنده ومعطينى مبلغ محترم

ليتكم شايفين ويهى شلون منصدمه من الى اسمعه

علينا العوض ومنا العوض لا بالله كدينا خييييير

ترى مو قاعده ابالغ، ما اقول الكل جذى ، فى حريم وبنات واعين ومثقفين بس لا نستهون فى هالنوعيه ترى وااايد غير

الى شفته بعينى اسمع سوالف واايد عن هالنوعيه

وبعدين بدت المسجات التخريبيه تنتشر ، لا نخلى الشيطان يلعب براسنا اى مسج تخريبى لا تنشره

**********

ما اذكر اول قبل سنتين لما افتر بالبلوقات كان ينقمت قلبى ويضيق خلقى مثل الحين ، الحاصل انى

كنت افتر على الجميع بدون استثناء الى اوصله اعزيه بالشيخ سعد ، لان ابونا كلنا وابى ادعيله كثر ما اقدر

قبل لا اعزى لفت انتباهى جم موضوع لهم بالاسفل قعدت اتقرى كان عن الانتخابات وانصدمت بطريقة طرحهم

انحدار المستوى بالطرح الى يخلى الانساان حيوان !!!!! مانى فاهمه الصراحه

انت ضد س من الناس تكلم ليش انت ضده عشان كيت وكيت وكيت بس نرتقى بطريقة الطرح ، ليش هالاسلوب مانى

عارفه ، حاولت اتفهم نوعيات هالبشر ما قدرت ، والادهى والامر الكومنات المؤيده من ناس كنت اعزها واحترمها

واحترم فكرها ، انت شبى تستفيد لما تحط عيال الناس وتسويهم حيوانات

واتشكك فى ذممهم وانت على قولتك ما اتعرفهم ولا قابلتهم بيوم ، على اى اساس تقول هالكلام ، لله فى الله ما ادانيه اوكى

يا اخى لا ادانيه ، تحصل وايد ان ما نبلع ناس لله فى الله ، بس نحترمهم نحترم شخصه نحترم فكره اى كييفه ، انت منت مجابله ولا

انت مناسبه شكو فيه !! ومنو انت وشلون تعطى نفسك الحق انك اتنزل من الناس بهالطريقه !! ل

الا اذا فى عداوه شخصيه احنا ما انعرفها وهذا اسلوبك وطريقتك بالهجوم هذا شى ثانى

والله ضاق خلقى اول ما كنا جذى كنه شويه وكلنا متواصلين الى يتفق معاى والى ما يتفق بس كنا نحترم بعض

انقدر بعض على اختلاف توجهاتنا وافكارنا اندش ونعلق وننقد والمحبه والاحترام موجودين

الحين ما ادرى شقاعد يصيير صاير هالعالم الكل ينهش بالثانى ويجرح فيه عالم صار مقزز كل ماله واييب ضيقة الخلق

حلاته الواحد يقظب ارضه ويدور بمستوى حبايبه والناس الى تحترم بعضها تحترم النقد واختلاف الرأى والفكر وتفهم

وادرى بتقولون لى كل واحد حر بالى يكتبه ولا ادشين وشعلييج وخليج بحالج

اى والله اناا الى اسفه انى نزلت نفسى وقريت الى ما يسرنى وتوووبه

بقول صح اى كل انسان حر وحر وكل انسان يعكس نفسه بالى يكتبه

ربعى وصديقاتى كل وحده فينا توجه ، الدين دين والفاصخ فاصخ والليبرالى ليبرالى والى ما يدرى وين الله قاطه بس كلنا

نحترم بعض وخوات دنيا ولا عمرنا جرحنا ابعض ، واذا تكلمنا بالانتخابات صراخنه شايل كل وحده اتشد صوبها بس

بالنهايه احنا حبايب وكاهى السنين والعمر يثبت

خلالالاصة الحجى ..... اتمنى التوفيج للجميع ، بس الدنيا ادوور وخافوا ربكم

عندكم اهل وبيوت والله عالم بالنواياه لا انت ولا انا

*******************

بالختام اتمنى التوفيق للى قلبه على الكويت الانسان النظيف الى يخاف الله الى يكون قد الامانة الى يوكلها الشعب له

اللهم وحد على الخير قلوب اهل الكويت واجمع كلمتهم

اللهم ولى عليهم خيارهم ولا تول عليهم شرارهم واجعل ولايتهم فى من خافك واتقاك واتبع رضاك

اللهم امين