الماضى ماضى ليش الاذية !!!

قلبى مو قاعد يطاوعنى مع ان عقلى اهو الصح

بس قلبى متعبنى مو راضى يستوعب ولا راضى يفهم

انا وعقلى بكووم وحضرت جنابه هالقلب بكووم

، انا وعقلى مرتاحيين بس قلبى تعبان وحن لهم

ويشتاق ولهانه على الصوت ولهانه على الضحكه

ولهانه على اليمعه ولهانه على الشوفه

بس اذونى حييل اذونى نفسيا عطيت بعفويه

وما لقيت بالمقابل عطيت بكل معنى الحب ولقيت النكران

بالعقل اوكى اوخر احسن واريح انزين قلبى شعلته ؟؟

ليش مو راضى يستوعب

صج على قولت خوانا المصريين القط يشتاق لخناقه

كاهم ناس يدورون رضاى ناس تبي اتشوفنى بس ابتسم

واضحك ناس يدورون راحتى

قعدت اقول حق نفسى ليش احب الشقا ؟؟ليش التفت للماضى الى سكرت بابه بيدى

وبحكمتى وبعقلى ليش اندور الشقا واحنا مرتاحين ؟؟

ليش القلب ما يذكر ولا يحن الا للى شقاه و تعبة واذاه؟؟؟

ليش ما يركب معانا الا الى يتعبنا

ليش الى يريحنا ما نتقبله والى يشقينا نحبه ونموت عليه

كلامى ترى مجرد هذيان اكيد لا ابى الماضى يرجع اقولها ومتأكده من كلامى

بس اهو هذيان وقلبى الله يجازيه اهو السبب

على قولت هانى شاكر انت السبب يا البى غاوى تعب غاوى سهر غاوى تقول حبايبى يا البى

وفتحت بابك للهوى وهذا الى ياك يا البى

ويسألوك ليه ترضى بعذابك تقول نصيبى واعمل ايه بالى انكتب

لكل محب ولكل واحد ناوى يحب سمعو هالاغنيه

عشان اتبطلون

تصبحون على الف خير ...

فوق هذا الحب احبك

فوق هذا الحب أحبك و بعد أكثر كثير … ياللي تدري ان قربك آنا احتاجه كثير
يمكن أكثر من غلا روحي لروحي
و انت من نساني بالدنيا جروجي … و نساني نفسي و خلاني أحبه
هو صحيح اني قدرت اوصلك … لكن ماني عارف وين أبوصل بالمحبة
لقيت بك عمري اللي ضاع … و لقيت انا فيك الأمان
لو بيدي ياحبيبي … كان أعرفك من زمان
لحظة اللي تلتقي بي … يبتسم بي حظي و نصيبي
و مثل ما أقول أنا أحبك … انت قول أنك حبيبي

عبدالمجيد عبدالله - فوق هذا الحب

بدون تخطيط وبدون ما نحس تلقى نفسك تحب وفعلا مرات نسأل نفسنا هالسؤال

وين بوصل معاك بالمحبه

تحس حبك ماله نهايه

وتنسى البدايه

انا بعالم ثانى مع هالاغنيه

صعب وصفه

صراع بين النفس والقلب

ها هما قدماى تقوداننى مرة اخرى اليك

كنت ادرى سالتقى بك مرة اخرى كان فى داخلى شعور مسبق بهذا اليوم
كنت اعيش لحظات حبك الاخيره ولم يهمنى شى سوى ان اراك

!وان انتهى منك فى نفس اللحظه
نعم كنت اخاف حبك كنت اخاف ان يشتعل حبك من رماده مرة اخرى

فالحب الكبير يظل مخيفا حتى فى لحظات موته

يظل خطرا حتى وهو يحتضر
كم كان حلمى به جميلا وكم هو اليوم مسطح وفارغ فى واقعه
وكم كان مليئا بإنتظارك وموجع بحضورك
اكانت نصف النظره الى تبادلناها تستحق كل هذا الوجع ؟؟
احيانا يضعنا القدر امام ماضينا الاليم
وكأنه يختبر مشاعرنا يختبر صبرنا يختبر عزت نفسنا وكبريائنا

صراع بين النفس والقلب

يا سااتر

ليش الكويتيين مو سمحين وبسرعه يعصبون
مانى فاهمه شهالحراره الى فيهم
كل واحد يمشى عاقد النونه والويه معفوس
ولا تقوله ادنى على وره كلاك
..................................
داشه الكلينك ، قاعده انطر دورى
طق الباب ريال اجنبى مسكين على غرفه الطبيب ودخل
ما اسمع الا صرااخ من داخل الغرفه وادرى مو الدكتور لانى اعرفه
انت اشفييك عمى ما تشوف ، ما تشوفنى قاعد ! اطلع براااااااااا انطر الدور
لول والله انا طلعت عيونى وبعدين مت مت ضحك شهالحراره
انزين خير يا طيير اشصار ليش الصراخ
هذاك الفقير قال اسف سكر الباب وطلع حتى ما قال اشيبى
........................
نييكم حق التخسبق الصبح بالشوارع
الحين الشارع مخطط وفى لاينات والناس انتام على بعض
محد يمسك خطه كل واحد يعر على الى يمه
الى دايخ مو شبعان نوم
والى ما يستوعب من الصبح فاصل ، ترى انا من هالنوع الى ما استوعب من الصبح
الحين الى حاصل طريق المغرب السريع مو مخطط ماسحين العلامات الارضيه ما ادرى ليش
وتعالو شوفااو المصخره بالشارع
لووووووووووووول هرنات وكل واحد فاج الدريشه معصب شراره مطلع لى نص ذراعه ويأشر على الثانى
والناس سايحه على بعض ، كل واحد يسير على الى يمه
يعنى انا بالدول الغربيه مرات نمشى بشوارع مو مخططه كل واحد ماشى بدربه
احنه ليش العصبيه و والفوضى ؟؟ الواحد ما يوصل الدوام الا موده زفت من العصبيه والصراخ بالشارع !!
............................................................................................
طالعه بالدوام رايحه سيارتى بالمواقف
ولا واحد ماسك الى يغسل السيارات وطايح فيه زف
انت غبى ما تفهم يالى فعلتك ويالى تركتك
والمصيبه يم سيارتى
كسر خاطرى بس الريال مصك مو مال حتى التفت اشوف شالسالفه
بس اسمع والله يقوله اشهاللقافه مغسل السياره من قالك ؟؟ الحين انا قتلك غسلها
والمسكين هذاك يقول سامحنى يا عمى اخوى مريض وانا ما اعرف السيارات !!
جان يقوله ما اتعرف السيارات لا اتغسلهم
الحين انا بقلبى اقول اشدعوه كل هاللويه كل بس عشان غلط وغسل سيارتك
خير يا طير ؟؟ يمكن رزقته الله كاتب له هالدينار عطى اياه وانت ساكت
مانى فاهمه ليش هالعصبيه والنرفزه اى شى زين مو شين الى صار فى سيارتك
..........................................................................

وحده اعرفها تقول كا ما اطلع مع ريلى ايام الملجه اغلب المرات نرجع متهاوش ريلها بالشارع

ليش ولا بالمطعم !! ليش يلتفتون يطالعون مرتى

لووووووووول والله انا يضحكونى اى خير يا طير خل يطالع

بتسكر عيون الناس

شدعوه

...............................................................

مصرى متعين عندنا بالدوام كل الموظفين يناديهم اهلا يا بش مهندسه واهلا يا استاذه انا يقولى يا دكتوره هههههههههههههههههه ليش انا دكتوره من بد الناس وبدوامنا الكسيف لا احنا مهندسين ولا دكاتره كلا اداريين
ههههههههههههههه يحليله بس بييلا يوم بينمسك بقوله انا ليش دكتوره ؟؟ اشمعنا ههههههه

................................................................

رساله الى كل واحد مشلوط وصدره ضيج

يا جماعه وسعوا اصدوركم وطولو ا بالكم ترى مو زيين

ما تسوى عليك هالاعصاب ، ترى كل من صحتكم

ترى انا اتكلم وثلاث ارباع اهلى مشلوطين وحاريين

اعصاااب الله هم يا كافى

وحريم العايله الاغلبيه فاجيين

فاذا الواحد معصب وتييله وحده فاجه اخته ولا مرته عادى تنذبح بالغلط

هههههههههههه

:)

قولولى انا صح
ان اغلب الكويتيين فيهم حراره زياده عن اللزوم واعصاب
؟؟

لحد يسأل جم عمرى :))

ما كان بودى اكتب شى بهاليوم بس قاعدا اجيك ايميلاتى فجأه فتحت الوورد وقعت اكتب

سنه انطوت من عمرى وبدا رقم يديد ، عمر يديد

اول شى الف حمد وشكر لك يا ربى انى بصحه وعافيه وهذا اهم شى بالنسبه لى

الصحه والعافيه من رب العالمين اكبر كنز يكبر معاك

بدونها احنا ولا شى

سنه انطوت بحلوها وبمرها

بس اغلالاط الدنيا وغباء الدنيا حسيته بالعمر الى فات

والسبب انى تعاملت مع ناس بعفويه وعلى نياتى بس مع الاسف اخذلونى

خصيت مجموعه دشت قلبى بسرعه بس انقرصت منهم حيل

كرهونى باحلى شىء سويته بالسنه الى فاتت

بس مع الايام تبين انها خيره من رب العالمين

كثير من الفرح وقليل من المراره والكدر

اعتبر نفسى محظوظه بالناس الى حوالى ولله الحمد اهلى صديقاتى معارفى
اخظأت اى اخطأت وان شاءالله ما راح تنعاد اغلاطى وخصوصا الغبيه الى بدون ما نحس نطب فيها

الى ينقالك عليها غلطه الشاطر بعشر

السنه اليديده من عمرى قررت اوقف قلبى اخليه يستريح خلالالاص خذا كفايته من الناس

قررت اشغل عقلى بدال قلبى
بستمتع بكل لحظه من حياتى القادمه
حبايبى اهلى وصديقاتى الى من بدايه الاسبوع مغرقينى بلطفهم وحبهم الله لا يحرمنى منكم
ومشكووريين على كل شى
سبحان الله كل ما نكبر كل ما نستوعب امور ونفهم
وصج لو ما انجرب ونطيح بالاغلاط ما نتعلم

ناخذ درس من تجاربنا بس اهم شى القلوب ما تشيل

اهم شى تحط راسك على المخده ضميرك مرتاح انك مو مزعل احد ولا مقصر بحق احد

ولكم للسنه اليديده
بتفاؤل وحب للجميع

:)

CHARISMA

10/4

I MISS U ......

كلمات لها أثر فى قلبى

ما هى خساره لو راح عمرى فدوه لك

راس الخساره لارحت منى و أنا أغليك

SMS