الى بتكلم فيه ملينه واحنه انعيد وانزيد فيه ، اكيد هذا مو اول بوست ينكتب بالمستشفيات الحكوميه
بس انا الاسبوع الى فات مريت بتجربه مع هالمستشفيات اللانتيك الى بديرتنا
مرات يحدك الزمان ويقطك عليهم ، الله هم لا اعتراض
اختى سوت حادث واهى تمشى بالممشى دعمها واحد واهى عابره من شارع لى شارع
اتصلوا فينا من موبايلها وقالوا ترى البنت بالمستوصف عشان الاسعاف تاخذها المستشفى
رحت انا اول وحده المستوصف الا اختى بغرفه الممرضات ويمها الدكتوره ننطر الاسعاف اتشرف من مستشفى مبارك
يت الاسعاف بعد نص ساعه
ركبت معاها الحلوين المسعفين يسالونها تقدرين تركبين بروحج ولا انركبج يالسرير !! هذا اول الخير
بدا يرتفع ضغطى ، قتلهم تسألون وحده مسويه حادث هالسؤال !! البنت مو قادره تتكلم ودمها ترس ويها
قتلهم انت صعدوها يمكن نزيف داخلى فيها يمكن شى !!
ونفس السالفه واهى تبى تنزل !! ها اختى تقدرين تنزلين ولا انزلج !! لا يناو
دشينا المستشفى ، قالى انت سوى اوراق الدخول ،قلت له اخوى حادث سياره قالى لازم بطاقه مدنيه !! نعم !!! اخوى
البنت من الشارع ماخذينها !! والصراجه ما قلت حق اهلى انا ييت معاها ولا عندى بطاقه ، قالى اتصلى على الاهل يجيبون البطاقه !!
شنو يجيبون وما يجيبوون !! خليته يقرق ودشيت ورا اختى الطوارىء
اهنى تبدى البلاوى الى اتخلى الانسان يبجى على الكويت والكويتييين
دشيت الا جنا عنبر !! الطوارىء عباره عن غرفه كبيره وسراير محذفه بدون تنظييم وكل اجانب
ادور اختى وينها الا محذوفه باااخر الدار ولا حواليها ولالالالا دكتور والبنت داشه حادث سياره ! يعنى المفروض الف دكتور حواليها
قمت اصرخ من قمت راسى وين الدكتووور اختى مغمى عليها ولا اكو احد يمها
ترد على السستر الهنديه بكل برود
انت لا يصرخ الحين دكتور يجى !! يا عينى عليج ، قتلها انا اناديه وينااا
شرف الدكتور بعد ربع ساعه من دشينا
الدكتور مصرى ، قتله دكتور الحقنى اختى سوت حادث وراسها كلا دم اخاف نزيف داخلى دكتور
جان يزفنى ، قالى انا اشوف شغلى مش انت اتعليمينى
انطميت وسكت ، صحت البنت اتألم واتون ، جنها من قلبى الونه انا قمت اصيح ، جان يقول تتحول اشعه
نطرنا ربع ساعه ثانين عشان ايون البورتر يوصلونها الى دار الاشعه
سوينا الاشعه
وين الدكتور ؟؟؟ نطرى لما اى
وننطر نص ساعه على ما يوصل الدكتور يشوف نتيجه الاشعه والبنت اتألم
يا الدكتور طااااير على حاله ثانيه قتله دكتور النتيجه !! قالى عندى حاله غيرها ؟؟؟
مر على حالتين وبعدين يا حق اختى ، الا انا ناشف دمى
شاف قال لا مافى نزيف بس رضه قويه
وباجى الاشعه مش من اختصاصى ما اقدر اشوفهم
نعم ؟؟؟ عيل من اختصاصه
قالى دكتور عظام !! قعداى نطراى على ما يشرف دكتور العظام!!
انزين عطوها مسكن البنت تتالم قالى لا لازم ما تتخدر عشان انعرف وين الالم
وننطر نص ساعه على ما يشرف دكتور العظام
ولما وصل يفتر على الاجانب اول بعدييييييييين الكويتيين
اهوه يفتر وانا امشى وراه جنى اطر منه يقولى اوكى انا قاى !! اى تعاااال يقولى حالتين وقاى
هاو هذا حادث مو لعبه !! الى قاعد يفتر عليهم ما فيهم شى موجودين من زمان مو حوادث سياره !ااه يا قلبى
لما وصل وشاف الاشعه جان يقول اااه مسكينه كسر بالكتف وشلخ بالرجل
والبنت تتالم طول الساعه ونص
يعنى لو من الاول شايفينها مو جان وفر هالالم على البنت !!
شهالحاله الى احنا فيها ، ليش جذى
وغير الوصاخه بالغرفه غير الاكل الى بقصادير يفترون فيه على المرضى
غير الخموره والريحه الخايسه غير السراير الوصخه
كلا اجانب واحنا يعاملونا بنزره وازفت معامله
انا بس ابى اطلب طلب واحد ! الكويتيين خلولهم طوارىء بروح مو مع الاجانب
ويصير لهم ستاف خاص لهم غير الاجانب
بعدين طوارىء دكتور واحد بس!! ما يصيير ما يلحق
يعنى حاله ادش حادث سياره تعاملونها مثل الى ياى بطنه يعوره من بيتهم !! شهالحاله الى احنه فيها
وبالنهايه لما يينه ناخذ الدوا دفعونا 5 دنانيير عشان ما عندها بطاقه مدنيه!! والبنت مجبسه وداشه حادث سياره
لا تعليق
22 comments:
يبا خطاكم السو
شنسوي بعد
هذي الكويت صل على النبي
الله يتمم علينا
احنا احسن من غيرنا(الظاهر اللي يقول هالمقولة المأثورة يقصد بغيرنا أي العراق) الله كريم
أولاُ خطاكم السو ..!! وأنشاء الله ما تشوف شرأختك ..!! وأجروعافيه لها ..!! بعدين ما شفتي شئ للحين أكو أعظم من هذا يصير بالمستشفيات ..!! وهذه الكويت "صل" على النبي ..!! وأحمد العبدالله .. ألي ما يستحي ..!!؟
غدى الشر
وخير إنها يات على جذي
لا رأيتم شر في عزيز أو غالي
أما عن مستشفيات ومستوصفات الحكومة
فحدث ولا حرج
عندنا وعندكم خير
وطول ما المستشفيات
لا يسهر عليها أهل البلد
سيظل الحال على ما هو عليه
إن لم يزداد سوء
ويبقى لدي قليل من الأمل
في الأجيال القادمة
ألف سلامة على أختج
دمتما بحب
تحياتي
uff uf salaaaamaat wo kha6aaakom elsooo !! eeeeh laa elmustashfayaat dam gathbenha hal me9arwa 3la edenya elsalam bes esharha mo 3laihom 3la ele yabhum! ma3araftay et7acheena walla chan zafaiteeh zafffa etdoodha madara oboiy 3ayaal:P ana oboiyyy athker layena endakhel yady allah yer7uma ham chethee emarme6ooona ya7gerhum aslan seda wain el doctor wo yezefaa lol kelhum yogfooon emjanedeen mayabelhum ela chethe!
خطاكم السو و الحمدالله على سلامة اختك
تدرين انا لو يصير فيني كذي شسوي؟؟
اول شي ادبغ الدكتور و اغسل شراعه بعدين اروح مستشفى خاص..انا وايد حار و عصبي يعني واحد يسوي كذي فيني يترحم على عمره
أولا خطاكم السوء والحمدالله على سلامة أختك ... ما تشوف شر .. وطمنينا عليها !!!ء
ما نقدر نقول ألا الشكوى لله يا عزيزتي .. الديره صايره سبهلله !! العوود ما يقعد بالبلد .. وزير الصحه لما يو بيطرحوون فيه الثقه .. أستقالت الحكومه بكبرها .. نواب ما تهمهم ألا مصالحهم الشخصيه .. من ألحين قاعدين يلمعوون بروحهم حق الأنتخابات اليايه عن طريق تحويل الشعب لطراروه .. أسقاط القروض .. منحه .. زيادة رواتب ..... فلوس ... فلووس .... وهلمه جره
الصحه يبيلها مستر سوبرديتوول أو مسز سوبرديتوول ينظفها من الجراثيم اللي فيها .. والجراثيم اللي أقصدهم المسؤلين والدكاتره أمثال الحوش اللي قابلتيهم ... عفيه عليج قدرتي أتجارينهم ... ولا لو أنا جان عفست عليهم المستشفى ... الله لا يحوجنا لهم .... ويحفظ حبايبنا يا رب
وعلى طاري الأسعاف ... وحدة عدت علي عن مره كبيره في السن طاحت عليهم غشيانه في بنيدر حاولوا يصحونها ما قدروا طلبوا الأسعاف .. ويتهم من مركز الزور .. وبطريجهم للعدان .. اللي تعد كانت راكبه معاها سيارة الأسعاف .. ما وعينا ألا الأسعاف عرت يمين ... وتهقين ليييييييش !!؟؟ والله ... عشان تترس بنزيين !!!تصورتي الموقف أشلووووون !!!؟؟؟ تقول : المره ما صحت ما ندري أشفيها وحاطيين الأكسجيين عليهااااا والأخ سيارته ما فيها بنزين وصفت عشااان يترسهااااا !!!.... تقول أقطع أيدي أذا الأكسجين بعد مو فاضي !!!!ء
المهم أختك أحسن ألحين ؟
:)
bo9ali7 :
خطاك ولا صابك يا بوصالح
والله شى مضحك مبكى
لو تشوفنى وانا افتر عليهم عمت عينهم
الله كريم
بوصالح ترى بطيت علينا
نبى شى يديد من زمان عنك
2 u all:
خطاك ولا صابك
والشر ما اييك ان شاءالله
هذى تجربه مريت فيها بالطوارىء
يموت الحى واهمه ما درا عنا
newme:
الحمدالله يا نيومى الله دفعها الحمدالله
ابى ريحت كويتى
ماكو كلا اجانب بالطوارىء
الله لا يعوزنا الا لرحمته
حبيبتى ما قصرتاى يا نيومى
شكشاكا:
خطاج ولا صابج يا شكشكا
حتى لما تيين تشتكين تلاقين رئيس الوحده مصرى ولا سورى ولا ما ادرى شنو هندى
ماساااة
ماكو كويتيين
وكلهم يمشون ربعهم
ادش حالة كويتيه ما يلتفت لج
يدور ربعه
حاله حاله
انا ارتفع ضغطى
ومت حره على الحال الى وصلت لها الديره
احنا والاجنب نفس الشى
لالالالالالالا اهمه احسن بعد
عندهم واسطه
هههههههههه
مصيبتى ما هندى السان
:(
اكلمهم جد بس بحده ولا احد معبرنى
فركاش:
خطاك ولا صابك عزيزى
الله يسلمك من الشر
شدبغ انا وين والدباغ وين
انا وصلت معاها بالاسعاف وبروحى محد معاى
واختى تصرخ من الالم وانا بموت من التخسبق والتدوده
اهى تصير وانا اصيح
وين فينى حيل اشد ولا اهاوش ولا ادبغ
تدودهم والله
ما اقدر انقلها خاص الا لما اطمن على حالتها
بعدين من حلات الخاص
الخاص يقطونك على الحكومه
ما يتحملون نتايج حوادث
انا بس بغيت سرعه بالاجراءات اى دخلوها اشعه وشوفاو شفيها
واذا شى جايد لا قدر الله نطير فيها بره
الديره صارت مو لنا لللاجانب يا فركاش
انا اتكلم عن حالات الطوارىء مو اى حاله عاديه
لو داشه مريضه جان اتسوى واسطه تمشى حالك
بس الحادث ما تدرى من يتلقفك
الله يرحم حال الجميع
مشكور يا فركاش
dilli 0 milli:
خطاج ولا صابج حبيبتى
والله يسلمج من كل شر
كلامج صح ميه ميه
لوووووووووووووووووول
لووووووووووووووووووووول
لووووووووووووووووووو
ما اصدق دلى وميلى قولى انها نكته بليييييييييييييز
::(((((((((((((
شهالحاله الاسعاف بتترس بانزييييييييين
لالالالالالا
لا تعليييق
اقولج يقولها تقدرين تركبين بروحج ولا انصعدج
يشاورها والبنت مكسره
وكلها دمان
مصخره
انا اخزه هذا من صجه ولا يضحك
الحمدالله وايد احسن
بس تحتاج وقت
نسييت لا اقولكم موقف صار اهناك
يت خالتى لانى ما قلت حق امى خفت عليه
الا اختى بغرفة الاشعه
ولا فجاه دشت اترولى فيها مواعين بلاستك مغطيين بقصادير
يوزعونهم على هالمسدحين الى بالطوارىء
انا طلعت عيونى ليش بقصادير يا مال الفقر
الا عباره عن موزه وتفاحه بالصحن ومغطى بقصدير
جان تقول خالتى لا لا كريزما هذا اكيد نذر وحده ناذره توزع اكل
لووووووووووووووول
طلعت لا هذا وجبه من المستشفى
الله يعز الحكومه
://
خطاكم السمو و الحمدلله على سلامة أختج ..
والله العظيم قاعد أتخيل الموقف جدامي ..
فورت والله .. شنو قهر !!؟ شنو هالمستشفيات !!
الله لا يعوزنا لمستشفيات الحكومة .. و الحمد لله على العافية :)
و سلامتكم
الحمد الله على السلام
والله يعينكم على هالمستشفى
الحاله صارت وااايد صعبه
شي يقهر
خطاكم السو وما تشوفون شر
والله شي يقهر
تروحين المستشفى
ومن اللي تشوفينه يرتفع ضغطج
الحمد لله والشكر على كل حال
نبني المستشفيات حق العالم وللاسف مستشفياتنا حدث ولا حرج
حبيبتي اهي يت على المستشفى مو لنا
الديرة بكبرها مو للكويتيين
كل جالية تمشي شغل ربعها
والكويتي يوقف شوكة ببلعوم الكويتي
آآآآآآآآآآآآآآآخ
عوار قلب
5a6aakom alsao
walaah alwa7ed bel kwt mayabee ey9eer maree9' walaah da5lat almostashfaa ehnee methal film alro3b alwa7ed 3alaa a39abaa meen awal mayroo7 lamaa ye6l3
walaah 7etaa loo makent maree9' 7etaa loo zayer a7ad maree9' hmm at7aatee
walaah a3rf nas emre9'aw meen zeyaart maree9' walaah shy eyfashel mostashfaa etyeeb almaraa9' 9ej mo gashmaraa alaah yaster 3alinaa walah
alaah eygawemhaa bel salamaa inshalaa 6amnenaa 3alihaa ok :)
صباح الخير على الجميع
:)
kuw_son:
خطاك ولا صابك مشكور
اى والله الله لا يقطنا عليهم
ويعوزنا الا لرحمتة يا رب
حسين:
الله يسلمك من كل شر
اى والله جنه غرب بديرتنا
مملوحه كويتيه:
خطاج ولا صابج حبيبتى
والشر ما اييج
والله الشى يحز بالخاطر
اصدقين الى عاش وشاف زمان اول اهو اكثر واحد يتاثر ويتحسر
الى عاش على زمان جابر
والى عاش السبعينات والثمانينات و شاف العز الى كنا فيه
يعوره قلبه على هالحال الى صرنا لها
cosimfree911:
`76ak wla 9abk ma etga9er
ee walaah elwa7d ma wedah ymreth wla y9er feh shy alah y36ena el 9e7a wel 3afyah
al7een mreth el 3nayaah el morakazaa !! yzed marathaa mn el jarathem ely b`3rfat el 3enayaah el morakazaa ta`7ayaal !!
klha wabaae`e el mstashfayat
masaaaat
mshkor wayd wayd
e`7ty wayd a7san el 7mdelaah
:)
خطاكم السو
بوست يرفع الضغط لما الواحد يقراه
احتر لما تصير الكويت جذي
المهم الحمدالله على السلامة
خطاكم السو ... وماتشوفون شر انشالله
أجر وعافية
الإهمال بالخدمات الصحية شئ أزلي من قديم الزمان
الله يصلح الحال انشالله
ماتشوفون شر
neo:
الله يسلمك من الشر
وسورى انى رفعت ضغطك
وما كتبته الا من حر ما فينى والله
:(
almas:
خطاج ولا صابج حبيبتى
اى بس شى يحر
شوفى انا داشه وادرى ان اختى ان شاءالله ما فيها الا العافيه
لان كانت اتكلمنى وعقلها معاها
ووايد امور بالبنت ادل ان اصابتها مو خطيره
بس انا سرحت وقمت افكر
ان
لوو البنت رايحه فيها
ولو ان الحاله خطره
شلون بيكون الحال !!
ماكو اى اهتمام بالطوارىء
تدشين محذوفه ونطرى الدور
اسم الله علينا بس لو نزيف داخلى ولا شى بتموت البنت وما ياها دكتور!!
هذا الى نرفزنى
بروووووووووووود
خطاكم السو .. خطاكم السو .. ما تشوف شر ..
وااااااي وأنا أقرى محترة فما بالج إنتي !!
وااااااااي ...
صججججج شي يحررررررر ... يمكن لو أنا مكانج جان عادي أقجه بسجيــــن من الحررره ..
:@:@:@ !!!!!!!!!!!!
ليه الحين محترة .. ليتج تشوفين شكلي و أنا أطبع !! كسرت الكيبورد !!
عمــّه بعينهم !!!
و هم لهم عين يستجوبونا ليه بغينا نعالج برة !!! من زيــــن أطبا و مستشفيات الكويت وإلا من زين شنو وإلا شنو ؟؟؟؟
:@ :@
شلون أختج ألحين !! إنشاء الله أحسن !!
و الأثول العمي !! اللي دعمها وينه ؟؟؟؟؟؟؟؟؟؟؟؟؟؟؟؟؟؟؟؟؟
:@
breeze:
خطاج ولا صابج والشر ما اييج حبيبتى والله
الحمدالله والله الله دفعها عنها
ولا بغت تروح
الى دعمها مسكين معانا بالمستشفى متحطم وميت خوف مصرى
سوالينا فلم
بجى ونواح ودى زى بنتى وانا افديها برابتى ولووويه
بس ما هدانا الا لما اطمن عليها وان كلشى اوكى
لان غلطااان اهو
الغلط راكبه من راسه لى كرياسه
طاااير بخط ممشى
مكتوب عبور مشاه لافته اكبر من ويها
حظرتا ساكب وساطره يمه فلبينيه خمره
يهذر معاها ونايم بالعسل وخبط هالفقيره اختى مسكينه
بس شتقولين
الشكوه لله
والمستشفى حدث ولا حرج
شوفت عينج الى قريتيه وترى انا وااايد مختصره عشان لا امللكم
بس التفاصيل اتشيب الراس والله
مشكوره حبيبتى انتى
والله يبعد عنكم كل شر
خطاج السو
عندي تعليق بسيط
شي طبيعي ان ياخرونكم وما يشوفها الدكتور بسرعه لان الكسر يقدر ينطر بس الم بطن او شي من هالقبيل صعب يخلونه مده طويلة
وزين انكم نطرتوا ساعه ونص هنيه في كندا الحوادث اقل شي 4 ساعات تنطرين
وحمدالله على سلامتها
وتقبلي مروري عزيزتي
بنت الكويت
اولا الساعه المباركه وحياج الله عزيزتى
:)
انا يوم قلت عوار بطن بس ظربت مثل وانا اقصد ان ما يميزون بالحالات الى ادش الطوارىء
ماكو سرعه انقاذ
بس ينقلون بالاسعاف ويقطون بالمستشفى عاد انت وحظج من يجابلج
على فراغت الدكتور
فلو كانت حاله خطره او مو خطره نفس المعامله والاجراءات
الله يعينكم اذا انت بغربه
والله يبعد عنج كل شر
واسعدنى مرورج
Post a Comment