شهالسالفة الى هابه بديرتنا ؟
يعنى شنووو يموت الكويتي مطعون
قمه بالبشااعه
وضحيتها شباب بعمر الورد
الاعمار بيد الله ونعم بالله
بس جرايم الطعن زااايده
ما عدا شهر على طعن الخدامه حق البنت المسكينه واهى نايمه :(
خدامه اذبحت بنت طعن مليون طعنه ليييش
متهاوشه معاها وحرتها !!
ولد ينطعن من ايرانى والسبب خزه !!!
وغيره وغيره ......
لى هالدرجه ارواحنا لعبه
لى هالدرجه ما قام ينعمل لنا حساب
شهالاستهانه بالارواح
شهالاستهانه بالعقووبه
اى مو لان ماكو عقوبه هذى حالتنا
ذبحتنا على بيزه!!
ماكوو رادع يخرعهم
الاجانب لاعبين لعب فينا
انعدم الامن
قام الكويتى يمشى بديرته خايف
الكل قوت شووكته بديرتنا
واحنه الى ننطمس ونندقر
اذاا نخز اجنبى ننطعن
شهالسااالفه العميه
شقاعد يصيير
:(
24 comments:
الله يرحمه و يرحمها و يقمد روحهم الجنه يا رب
ما أدري شقووووول
الروح قاموا يستهينون فيها
يبيلهم يتعلقون يساحه الصفاة
للعبرة لمن لا يعتبر
العيب بالكويتين مو بالاجانب والاسباب واايد
اول شي احنا الي نتوسط لهم
ثاني شي العيب فيينا سمحن لهم تطاولون على قوانينا
ثالث شي في واييد كويتين تعاملاتهم قاسية مع العمالة الي عندهم والرحمة نزعت من قلوبهم
يعني في وايد كويتين ظالمين
وبعدين ليما نتكلم عن عيوب الاجانب جنة احنا مافينا عيوب
ترى كل العيوب فينا احنا بعد نطعن عشان خزة واحنا بعد نموت بجرعة زايدة واحنا بعد نطوف الاشارات ونذبح الاوادم
واحنا بعد سكارة ونسوق سيارات ونذبح عيال خلق الله ونتوسط للذابح واحنا بعد
فينا كل العيوب
مره من المرات شفت باحد الشوارع بالكويت واحد تناجر مع واحد بالسياره قام الاخ وفتح الدبه وطلع سيف والله العظيم سيف
رايح بيطق الثاني
كل هذا عشان خزه
او ليش نايم علي
تدرين متى تتعدل الامور
اذا انطعن واحد منهم مو شرط يموت
هني راح يلتفتون على هالظاهره
الشارع والاسوقه مليانه مجرمين
تخيلي بس كل يوم ماسكين واحد بتفتيش عليه حكم مؤبد او قضايا هتك عرض قد تصل احكامها الى عشرات السنين
قلبي عورني بس
هالايام صار الواحد ما يصدق شيئ
خصوصا من الجرايد.....اكيد السالفه مو مالت خز او احرقت حجابها وتخانقت معاها.....اكو اشياء ما نعرفها
واحنا نحكم على الظاهر بس...وطبعا مو صحيح هذا
المهم اللى لازم نعرفه ان الوقت تغير مو بس بالكويت ....ترى فى كل مكان
اكو ناس تحبب...وناس تحشش...وناس تاخذ ابر....وناس تشم وناس تشرب
واحنا علينا نحط بالنا ونتحاشى هالاشكال.....شلون ؟؟؟؟ هذا هو السؤال
ومن امن العقوبه ساء الادب
الله يرحمهم برحمته ويغفر لهم
وياخذ المجرم القصاص العادل
اللى يبرد فلوب اهاليهم
ولا حول ولا قوة الا بالله العلى العظيم
الله يرحمهم و يصبر أهلهم
و يحفظنا و يحفظكم من كل شر
مساء الخير اختي كريزما...سألتي شقاعد يصير؟؟ انا اقولج شقاعد يصير...اللي قاعد يصير ببساطة ان الكويتي لازم ينهان داخل ديرتة ... لان داخل البلد القانون ما يطبق .. واذا تطبق يطبق على ناس و ناس.. الحكم ... وين الحكم ؟؟؟ اذا كان هناك حكم في البلد محد يتجرأ يسوي هالسوالف.. بس الامور سايبة .. تلقين باجر السفير الايراني يتدخل ..وشوي ولا طالع الحبيب براءة... بالكويت كل شي يصير
هلا عزيزتي كاريزما
الموضوع متشعب وشائك و الجريمة والخارجين عن القانون والصح والغلط موجود بكل مكان وزمان بس نوعية الجريمة تغيرت لأسباب وايد
وأنا أعتقد أن إحنا لكويتيين لنا دخل خصوصا ان معظمنا ينظر للجنسيات الثانية نظرة دونية خصوصا الجنسيات الآسيوية وللأسف يا كاريزما شريحة كبيرة من لكويتيين ما يحترمون قانون دينهم وبلدهم ونبي الكل يحترمنا إشلون ففاقد الشيء لا يعطيه
بس هذا بصوب وطعن البنت المسكينة بصوب لأن مهما كانت الأسباب ما يحق لأي شخص ان يزهق روح إنسان مهما كانت الدوافع ولا نعيش بقانون الغاب وربنا قال القاتل يقتل ولو بعد حين
والله يرحم البنت ويصبر أهلها وآنا وايد تأثرت وبكيت لأن عندي بنت بنفس عمرها الله يخليها لي ويحفظها وايد صعب على الاهل صعب الله يعينهم ويحفظ عيالنا
اللهم لانسألك رد القضاء إنما نسألك اللطف فيه اللهم آمين
والله مادري شقاعد يصير
القتل صار بالشوارع على اتفه الاسباب
كل يوم ناس مذبوحه والاسباب قمة بالتفاهه
شسالفة ،، وين العيب ليش قاعد يصير جذي
يعني شاب عمره ما تعدى 16 سنه يقتل
لييييش شالسبب
علشان خزني واخزك
الصراحة شي خطير وااايد
احنا قاعدين نتراجع حق التخلف وقانون الغاب
الله يستر من الياي
واااي كل ما أفكر بهالموضوع ينقمت قلبي وما أنام الليل .. مع إن تخصصي قانوني يشمل هالسوالف بس سبحان الله ما أتحملها .. :((
وكل سالفة أسمعها أو أقراها تصير فيني حالة ما أدري شلون أوصفها .. بس جد جد ما أتحمل .. !!!
ماني قادرة أستوعب شلون يقدر بني آدم يذبح بني آدم مثله ببشاعة تشمئز لها النفس .. شلووووووووووون يقدر ؟؟؟
@@ ؟؟؟؟
إنزين مبطوطة جبده منه ووده يذبح ؟ خل يحط سم أو كلش كلش يخنقه ..
بس ليش العنف و الشناعة الفظيعة هذي ؟؟؟ دماميين و طعن و نحر و حرق و تقطع .. وااااااااااااي شلون يقددددرررررررررررررررررر ؟؟؟؟
:(((
الله يهدي كل من فيه نزعة الشر هذي .. وعسى الله يكافينا و يحفظنا اللهم آميـــن .. الواحد قام يخاف حتى من نفسه بهالزمن :\
الله يرحمه يارب
وربي ضاق صدري يوم قريت الخبر بالجريدة
:(
الجرايم زايده عندنا بصورة غير طبيعية
واكثرها من الخدم
بس الله يرحمنا برحمتة ويحفظنا
والله يستر من الي ياااي
للاسف نتيجة طبيعيه لانعدام هيبة القانون و تجارة الاقامات اللي تدخل من هب و دب علشان البيزتين اللي يطيحون بيد اللي يستوردهم
رحت عزى الولد لان
لانهم من نسايبنا
وابوه رجل دين وامام مسجد
ولكن المشكلة بكبرها سخيفة
خز؟؟
وين قاعدين
الله يرحمه ويغمد روحه الجنة
شووووفي يااا كاريزما يااا حبيبتي
الآية معكوسة عندي ... أنااا اللي بذبح الفلبينية اللي عندي من خداااااايهاااااا....!!!ء
بسسسسس طااااب خااااطرررري منهااااا ... يااابتلي الضغط وسكري وصل الحفه !! أشوة بتذلف شهر سبتمبر
كل هالقضايا كانت قضايا رأي عام
ننشغل فيها فترة
و ما ندري شنو صار عقبهاا
!!
الطامة الكبرى ما في تحرك على مستوى
يخليهم قبل لا اييون و يتسهليوون بلاويييهم .. يفكرون انه اوووه لحظة هذي ديرة قانون
!!
لو تنحط نهاية كل هالمجرمين و المجرمات
على الجرايد و في الاعلام مثل ما تنعرض كخبر بالبداية
و يشووفون الباجيين بعينهم
جان فرق الوضع شوية
:(
الله يخليج .. يقول الخبر بالجريدة الخدامة اللي ذابحه البنت الله يرحمها
ممتنعة عن الكلام
!!
بكيييييييييييفها
بعد ذبحتها و خلصت .. زردووها و خلاص
اثبات الجريمة و بس
تحقيق و حالة و طوالة و قصيص
تتدخل عقبها سفارتها و يكروتون الموضوع
حسبي الله عليهم
وهذا اللي انهى حياة شاب على خزة
لا حول و قوة الا بالله
يعني شي فظيع
ما عليه محترة بانطلق زيادة
اسأل الوالدة شنو عقابه
تقول يخلوونه يخيس بالسجن
نوم و اكل و يمشي له معااااااااش
وااااااااااااااااااااي
الله يعين اهله و يرحمه و يغفر له
:'(
و يحفظ ديرتناااا من هالمينن
طلعت اللي بقلبي مشكورة
امس كل ما اشوف ويهه اخوي (كبر الصبي) تخنقني العبرة
ايه والله وزارة الداخلية ضعيفه .. الشرطة بصوب و الناس بصوب .. الله يستر اتمنى يمسك هالوزارة واحد شرير عشان طراثيث البشر يعرفون حجمهم بهالديره
بركان حيل ثائر
والله العظيم اني كل مااذكرهم تدمع عيوني !؟
عسى الله يرحمهم ويصبر قلوب اهلهم عقبهم
بس والله قلبي يعورني :(
الله يرحمهم .. ويصبر أهاليهم
شباب بعمر الورد الدنيا جدامهم وآمال أهاليهم بعيونهم
حسبي الله عالظالمين .. ياعلهم الضربة والله من قهري على البنت المسكينة
يعني شنو خدامة تنقهر من زواج ريلها عليها .. تحط حرتها ببنت مالها ذنب
حسبي الله على هالخدامة
البنية الله يرحمها ويصبر أهلها
ويرحم الصبي ويصبر أهله
بالآخر أقول
من أمن العقوبة أساء الأدب
من أمن العقوبه اساء الأدب ..!!؟
قاله من أمرك قاله من نهاني ..!!؟
مختصر مفيد
وااى الموضوع حدا يقمت القلب لى درجه مانى قادره ادش بالمود وارد اذكر الى صار كل ما افتح بلوقى ينقمت قلبى واتذكر واوخر
:(
ريمه:
بالضبط يبيلنا ساحة الصفاة مثل اول
tresten:
كلامك منطقى ما اختلف معاك عليه
بس ليش ما كنا نسمع اول عن هالشى؟؟
ليش الحين زايد وبكثره وبفترات متقاربه
وبعدين صغااار
يعنى 18 سنه شعنده مع ايرانى يتهاوش وينطعن ؟؟
وغيره وغيره
ليش ما يصير عندنا قانون صارم
الواحد يفكر مليون فكره قبل لا يفكر ان يقتل!!
انا ما اقولك احنا خالين من العيوب
محد خالى اخوى
بس عااد مو بهالبشااعه
:(
براك:
استغفر الله
شهالحاله الى وصلنا لها
:(
الله يحفظنا يا ربى
بنت الشاميه:
انا بعد متوقعه السالفه مو سالفة خزه مو معقووول
امين يا بنت الشاميه
joli:
ameen ya rb
عثمانى:
مساء النور يا عثمانى
مو هذا الى يعور القلب
ان ما فى راادع
واهمه هالاجانب يدرووون زيييين الكويت سكثر تسيب فيها
الحين هذى الخدامه يقولك مطوقين سفارتها الجناح بالمستشفى حمايه عليها
تخيل
كادى:
اتفق معاك والله العظيم انتى صح
بس اطقها اتحاوش
يتكامشون يتفالعون
بس تييها واهى نايما وتطعنها مليون طعنه
وااى وااى
شهالقلب !! شلون اقدرت
وهذات الثانى
ترى الطعن ابشع صور القتل!!
سميها طلقه رصاص
شنق
وايد وايد بس وااى اقعد اطعن فيها لين تموت
:(
يبجى
الله يحفضنا يا رب
حسين:
ما اعتقد عشان خزنى واخزك
الله يستر
الخلاصه يا حسين انفقد الامان بديرتنا وهذى الى يكدر ويضيق الخلق
:(
breeze:
بعد عمرى الله يعينج
انا مو نوعى افتح جرايد
ولا احب اسمع انا اعرف عمرى اتازززم
بس هاليومين الى فاتوا بدا الصيف وخف الشغل بديت اقرى جريده
ويااا ريتنى وا قريت
خبرين ما تعداو الاسبوعين ومثل الجريمه
طعن وصغار شباب بعمر الورد
!!
شتبين منى والله هسترت
شى مو طبيعىىىى
ابييييه عسى ما ايينا اليوم الى يصير هالخبر عاادى ونمر عليه مرور الكرام
:((((
اى والله صدقتىى الطريقه بشعه حدهاا
واى خروف ينحر انا افكر شلون هالذباحين لهم قلب يذبحون
هذوول اوووادم
:((
شهد:
الله يرحمهم ويحفظنا يا شهد
بنت الكويت:
اى والله
اميييين
ابو اسحق:
وانت الصاج
ماكو رادع
لا ويقولك العماله الى تدش فى منهم خريجين سجون
يقطونهم عندنا
مرضى نفسيين
يعنى حثاله الله يسلمك
واحنه نقبض
:(
مشارى:
:(
الله يرحمهم
والله يا مشارى قويه شالفة الخز
ما ادش العقل
دلى وميلى:
واااى دلى والى يسلمج ديرى باالج
ما عليه تحملى لما تذلف
طولوا بالكم عليهاااا
بلييييييييييييز
والله قمنا نخاف
:(
ورده:
اى اى ادرى مأساة
a7la eng:
منورتنى عزيزتى
بالضبطط
ماكو راادع
ممتنعه عن الكلام
طرااق واحد يخليها تتكلم عدل
عمت عينها
ما اعتقد هذى صاحيا اكيد مينونه مريضه
ما ادرى
صبراى الحين الاخبار تنقمت عن سالفتهم
لما ننساها
والله يا حرت قلب اهاليهم المساكين
الله يصبرهم يا رب
ويرحمهم امين
بركان:
اى والله صاااج
بركان انت امسكها وثور بلييييز
ريلاكس:
حبيبتى انتى
امييين
الماس:
امين امين
اىى والله من امن العقوبه اساء الادب
:(
2 u all:
ولكم باك
فقدناك
ما ادرى انك رديت للتدوين
قاله من أمرك قاله من نهاني ..!!؟
قعدت افكر فيها وايد
!!
الامور تتعدل لما ينظر للشرطة نظرة وظيفة مسؤولية مو وظيفة فيها رزة وواسطات
الامور تتعدل لما كل انسان يحس انه ادمي واللي جدامه مثله
الامور تتحسن لما يعاقبون كبير ويقرضون اظافر مستسبع
الامور تتعدل لما الحكومة تحس انه تكتل او تجمع ناس من فئة معينة بجهة وظيفية واحد هو اصل الخراب
الامور تتعدل لما اليهالوه يفهمون انه الرجولة هي مسؤولية واخلاق قبل لا تكون عنترية وقلة ادب
الامور تتعدل لما الاسرة الكويتية تقوم بدورها وتربي عيالها وتحاسبهم قبل لا تفكر شنو كلو او شنو بيلبسون
الامور تتعدل لما نكبر دماغنا ونتغاضى عن التوافه
الامور تتعدل لما كل واحد فينا ينظر للقانون على انه الملجأ الوحيد مو ننظره كشطارة لما نكسره
الامور تتعدل لما ما تبقى هل الامور
بوصالح
واحنا بعيدين كل البعد عن الى قاعد تتكلم عنه
ايييه صدقت
بس وينا احنا وهذا حالنا وويييين الكلام الى تقوله
Post a Comment